ســــلامتك يا محروسة

بســــم الله الرحمن الرحيم

ســلامتك يا محروســة

بقلم : ل. م/ إيجل 16

سالمه وسالمه ياسلامه ... ومصر لها ألف سلامه
سالمه وسالمه ياسلامه ... وعِداهـا دايما في ندامه

رُحت وفَرَشولك الأرض حرير
وقلعت لك أمريكــا هدومها
وعلمها لك عملوه بشكير
لزوم الحج لأصنامها
والكل مسك في إيديه زمامير
واتلموا كريمها على لئيمها
لأ ماحناش داقين عصافير
ولا راح تاخدونا ف دوامة
لأ
سالمه وسالمه يا سلامه ... ومصر ماهيش لابسه كمامة

كل اليهود عملت ليلة
تقولشي ده شيخ طريقيتهم
وبأعلى زيطة وهليله
خدوكوا من باقي عيليتهم
يعني ف لغتهم لو شيلنا
(المو) من إسمك دي علامة

سالمة وسالمة يا سلامه ... ماعادش فيه أي كرامة

قانون طوارئ إيه ياسطى؟
قانون طوارئ ليه ولمين ؟
ماكفاكوش قهر السُلطة
وذُل كل المصريين
وجودكوا بيننا صبح غلطة
وعار... وحُرمَة ... ومَلامَة

سالمه وسالمه يا سلامه ... بينكوا وما بيننا صبح ياما

تطلب حماية أمريكا؟
تطلبها ليه وازاي ولمين؟
مش تبقى عيبه وهتيكه
لو جت تموت مصريين؟
المعركة مابيننا وشيكة
حتى ان ولادنا بقوا يتامى
يا تمسحونا بأستيكه
ياتبقى للمصري كرامه

وسالمه وسالمه ياسلامه ... والخاين مايطولشي زعامه

يامصر وحياة مين بدعك
ومن جنته .. وهبك نيلك
لنقوم ننور لك شمعك
والعزة من تاني تجيلك
وقلوبنا تمسح لك دمعك
وتعودي مرفوعة الهامة

سالمه وسالمه ياسلامه ... وساعتكوا دقت يالمامه
سالمه وسالمه يا سلامه ... وسلامتك يابلادي ياماما